Eendag ry ek verby ’n huisie waar twee ouer mense op die stoep gesit het. Dit was ’n wonderlike prentjie van vrede. ’n Paar jaar later kom die huisie in die mark. Die eienaars was baie tegemoetkomend met die prys en ek kon die huisie bekostig!
Dit was bietjie verwaarloos en alles was oud. Met raap en skraap, en ’n pa wat gehelp het, het ek vier jaar later genoeg geld gehad om die hele huis op te knap. Ek werk en bly in die Hoanibrivier in Namibië, en het met die hulp van Melany Lotter en CB van Zyl (heen en weer oor ’n magdom WhatsApps) uiteindelik my droom verwesenlik. Melany het “gehoor” wat ek wou gehad het en CB het alles laat gebeur.
Ek stuur net foto’s van my gunstelinge: die badkamer, kombuis en buitekant.