Ek het onlangs die wolskuur op ons plaas in die Karoo omskep in ’n trouvenue, maar ná die eerste plaastroue het ek besef ons benodig verblyf vir die trougaste en families. Naby die wolskuur (venue) was daar 10 werkershuise wat nie meer in gebruik was nie. Ek het nou reeds 6 van hulle ingerig as akkommodasie – hierdie huisie was my eerste poging. My idee was om die karakter van die huisies te probeer behou. Die sinkdakke, houtbalke en buitemure is nog soos dit oorspronklik was. Dit was ’n groot taak, want daar was nie elektrisiteit, water of riolering nie. Dit het lank geneem om al die roet van die houtbalke af te skuur en van die sinkdakke af te skrop. Die misvloere is met sement vervang. Slote is gegrawe om waterpype aan te lê en ’n septiese tenk moes gebou word vir die toilette. Vakmanskap was ’n groot uitdaging in ons plattelandse dorpie, so ook die beskikbaarheid van basiese boubenodigdhede. Die eindresultaat was egter oor en oor die moeite werd.