Melkweg Karoo – ’n droom van salige sielsvrede!

Die droom van Melkweg het in die harte van ons Verwey-familie ontstaan. Dit was altyd ’n hartswens om ‘n afpakplekkie in die Karoo te besit waar ons siele en menswees tot rus kan kom. Ongeveer twee jaar terug het ons op ons droomhuisie op die pragtige Karoodorp Aberdeen afgekom. Alhoewel ons gesien het dat die huis baie liefde en aandag kort, het ons die uitdaging met ope arms aanvaar. Wat ons vonds nog meer spesiaal maak, is die feit dat Aberdeen en die Karoo die Verwey-familie se hartland is. Een van die grootste vondste tot dusver was toe ons ná die koop uitvind dat ons Karoohuis aan een van ons oupa se susters behoort het. Ons het gevoel ons kan weer wortel skiet in hierdie grondstraat.

Alhoewel ons fondse baie beperk was, het ons die uitdaging met geesdrif aangepak. Met ’n fantastiese en ywerige plaaslike werkspan het ons elke deel van ons huisie met liefde en sorg aangepak. Ons wil graag Tuis se redaksie innooi in die leefarea van ons Karoodroom om te deel in al die mooi.

Ons het die huis in Aberdeen, Oos-Kaap, in April 2022 gekoop as uitspanplek gedurende winterjagvakansies.

Die struktuur was in ’n goeie toestand, met geen waterlekkasies of strukturele probleme nie – ’n goeie begin vir so ’n projek. Ons missie was om soveel moontlik van die bestaande deure en kaste te behou en ’n neutrale eenheid regdeur die huis te skep met ’n vars laag verf.

Die eerste stappe was om plek te maak deur onnodige geboude bankies en strukture (sien voor-foto’s) af te breek en die uitlopende verskeidenheid teëls te verwyder. Hierna is ’n nuwe kaggel deur plaaslike vakmanne ingebou. Daar was aanvanklik net een slaapkamer, maar daar was potensiaal om ’n tweede slaapkamer te skep deur slegs ’n muur te bou en ’n deur in te sit (soos heel moontlik vroeër jare die geval was, ’n gang met twee kamers aan weerskante). ’n Nuwe sementvloer is gegooi en verseël; na die nodige herstel- en pleisterwerk kon die verfwerk binne en buite begin. ’n Wit palet was die logiese keuse aangesien dit ekonomies en ook maklik verkrygbaar is (boumateriaal word net Vrydae van Graaff-Reinet af op Aberdeen afgelewer).

Die oorspronklike kombuiskaste is behou en het net ’n nuwe baadjie gekry met ’n vars laag verf en nuwe muurteëls.

Toe kon ons begin met die dekor. Van vintage-borde en -meubels (laasgenoemde verfraai met ’n laag verf) en winskope op veilings en markte is gebruik vir karakter, maar met een gedagte vooropgestel: om die eenvoud van die Karoo in ag te neem.

Dankie vir die geleentheid om ons mooi Karoodroom met Tuis te deel.