Terwyl ons in Viëtnam gebly het, het ons so erg na Suid-Afrika verlang dat ons ’n erf op Wildernis aanlyn gekoop het. Die plan was om iets in ’n Victoriaanse kothuis-styl hier te bou. My vrou, ’n illustreerder, het die ontwerp saam met die argitek Henry Greyling gedoen.

Die motorhuis en oprit was eerste aan die beurt, maar die projek het gou handuit geruk en verander na ’n klipkothuis met ’n solderkamer. Toevallig het ons afgekom op ’n oom wat al jare lank antieke vensters, deure en trappe versamel. By hom het ons ou skuifraamvensters en Oregondennehoutdeure met kosyne en argitrawe gekoop, elkeen met ’n storie en geskiedenis.

Die baksteen- en klipwerk is deur ’n messelaar gedoen (iemand wat sy kuns in Ierland geleer het), maar die res het ons self gedoen. Dit sluit al die verfwerk, houtwerk en afronding in.

Tans bly ons in die kothuis terwyl ek besig is om die hoofhuis stadig maar seker op my eie te bou, so tussen twee kinders en werk deur.